ஞாயிறு, 15 நவம்பர், 2026

தமிழ்நாட்டுப் பெண்கள் மாநாடு (13.11.1938)

 தமிழ்நாட்டுப் பெண்கள் மாநாடு (13.11.1938)


ஈ.வெ.ரா. அவர்களுக்கு 'பெரியார்' என்று பட்டம் கொடுத்த தமிழ்நாட்டுப் பெண்கள் மாநாடு!


தந்தை பெரியாரின் தலைமையில் 13.11.1938 ஆம் நாள் ஞாயிறன்று சென்னையில் ஒற்றைவாடை நாடகக் கொட்டகையில் சுயமரியாதை இயக்கப் பெண்களால் நடத்தப்பட்ட தமிழ்நாட்டுப் பெண்கள் மாநாடு வரலாற்றுச் சிறப்புமிக்க ஒரு மாநாடாகும். இது பெண்களின் ஆற்றலையும் வலிமையையும் துணிவையும் எடுத்துக்காட்டிய மாநாடாகும். இந்த மாநாட்டின் நோக்கத்தையும் முழுச் செயல்பாட்டையும் எதிர்கால இளந் தலைமுறையினர் தெரிந்து கொள்ள வேண்டியது ஒரு வரலாற்றுத் தேவையாகும்.



சென்னை 13.11.1938 பிற்பகல் 1.00 மணிக்கு சென்னை பெத்துநாயக்கன்பேட்டை கிருஷ்ணாங்குளத்தை யடுத்த காசி விஸ்வநாதர் கோயில் முன்பிருந்து தமிழ் நாட்டுப் பெண்கள் மாநாடு ஊர்வலம் புறப்பட்டது. மாநாட்டுத் தலைவர் தோழர் திருவரங்க நீலாம்பிகை அம்மையார், தோழர்கள் தாமரைக் கண்ணியம்மையார், பண்டித நாராயணியம்மையார், டாக்டர் தருமாம்பாள். மூவலூர் இராமாமிர்தம் அம்மையார், பார்வதி அம்மையார், மலர்முகத்தம்மையார். கலைமகள் அம்மையார் முதலியோரும் தலைவர் தோழர் ஈ.வெ.ராமசாமி, தோழர் அ.பொன்னம்பலம் உள்ளிட்ட அய்ந்தாயிரத்திற்கும் மேற்பட்டோர் ஊர்வலத்தில் கலந்து வந்தனர்.


மாநாட்டுத் தலைவர், திறப்பாளர், வரவேற்புக் கழகத் தலைவர்களைக் கோச்சில் வைத்து அழைத்து வரப்பட்டது. ஆயிரக்கணக்கான பெண்கள் தமிழ்க் கொடிகளை ஏந்தி தமிழ் வாழ்க! தமிழ்நாடு தமிழருக்கே! இந்தி வீழ்க! தமிழ்ப் பெண்கள் வாழ்க! தமிழர் வாழ்க! என்ற கோஷங்களிட்டு வந்தனர். தமிழ்ப் பெண்கள் தமிழ் வாழ்த்துகள் பாடி வந்தனர்.


ஊர்வலத்தில் பெண்கள் மட்டிலும் 2000 பேர்கட்கு மேலிருந்தனர். ஊர்வலம் குப்பையா தெரு, தங்கசாலைத் தெரு, ஆதியப்ப (நாயக்கன்) தெரு, வால்டாக்ஸ் ரோடு ஆகியவற்றின் வழியாக வந்து சரியாக 2 மணிக்கு மாநாட்டுக் கொட்டகையாகிய ஒற்றைவாடை நாடகக் கொட்டகைக்கு வந்து சேர்ந்தது. ஊர்வலம் வரும் முன்பே மாநாட்டுக் கொட்டகை நிரம்பி கொட்டகைக்கு வெளியிலும் பல்லாயிரக்கணக்கான மக்கள் நிரம்பி இருந்தனர்.


கொட்டகையில் ஒலி பெருக்கி கருவி அமைக்கப் பட்டிருந்தது. மாநாட்டில் பெண்கள் 5000 பேர்கட்கு மேல் கலந்து கொண்டனர். மாநாட்டுக் கொட்டகை வாழை மரங்களாலும், கொடிகளாலும், வரவேற்பு வளைவுகளாலும் மிகச் சிறப்பாக அலங்கரிக்கப்பட்டிருந்தது. வெளியில் நிற்போர்க்கும் கேட்குமாறு ஒலிபெருக்கி அமைக்கப்பட்டிருந்ததால் பல்லாயிரக்கணக்கான மக்கள் வெளியில் இருந்து பேச்சுகளைக் கேட்டனர்.


முதலில் தலைவர், திறப்பாளர் களை வைத்து ஒரு குரூப் போட்டோ எடுக்கப்பட்டது. பின்னர் மாநாட்டு வரவேற்பு கழகத் தலைவரின் வேண்டுகோளுக்கிணங்கி, தோழர் மீனாம்பாள் சிவராஜ் அவர்கள் மூவரசர் தமிழ்க் கொடியை ஏற்றி வைத்தார். தோழர்கள் சி.கலைமகள், பட்டு (பட்டம்மாள் பாலசுந்தரம்), தாமரைக் கண்ணியம்மையார், பார்வதி அம்மையார் ஆகியோர் தமிழ்ப் பாட்டுகள் பாடினர். பின்னர் தோழர் திருவரங்க நீலாம்பிகை அம்மையாரைத் தலைமை ஏற்குமாறு வரவேற்புக் கழகத் தலைவர் கேட்டுக்கொண்டார். அதை ஆதரித்து தோழர்கள் மூவலூர் இராமாமிர்தம் அம்மையார். மலர் முகத்தம்மையார். ராணியம்மாள் (தோழர் அண்ணாதுரை அவர்களின் மனைவி) ஆகியோர் பேசினர். டாக்டர் எஸ். தருமாம்பாள் மாநாட்டுத் தலைவருக்கு ஒரு வரவேற்புப் பத்திரம் படித்துக் கொடுத்தார். தலைவர் தலைமையுரையாற்றினார். தோழர் பார்வதி அம்மையார் அவர்கள் தோழர் ஈ.வெ.ரா. நாகம்மையார் திருவுருவப் படத்தை திறந்து வைத்தார்.


பின்னர் முக்கியமான பல தீர்மானங்கள் நிறைவேறின.


தமிழ்நாட்டுப் பெண்கள் மாநாடு நிறைவேற்றிய தீர்மானங்கள்:


1. இந்தியாவில் இதுவரையும் தோன்றிய சீர்திருத்தத் தலைவர்கள் செய்ய இயலாமல் போன வேலைகளை இன்று நமது தலைவர் ஈ.வெ.ராமசாமி அவர்கள் செய்து வருவதாலும் தென்னாட்டில் அவருக்கு மேலாகவும் சமமாகவும் நினைப்பதற்கு வேறொருவரும் இல்லாததாலும் அவர் பெயரைச் சொல்லிலும் எழுத்திலும் வழங்கும் போதெல்லாம் பெரியார் என்ற சிறப்புப் பெயரை வழங்குதல் வேண்டும் என இம்மாநாடு எல்லோரையும் கேட்டுக்கொள்கிறது. [1]

2. மணவினை காலத்தில் புரோகிதர்களையும் வீண் ஆடம்பரச் செலவுகளையும் விலக்கிவிட வேண்டுமென இம்மாநாடு கேட்டுக்கொள்கிறது.

3. மற்ற நாடுகளைப்போல் தமிழர்கள் ஒன்றுபட்டு ஒரு சமுகமாய் வாழ்வதற்கு இன்று பெருந்தடையாயிருப்பது சாதி வேற்றுமையாதலால், சாதி வேற்றுமைகளை ஒழிப்பதற்கு இன்றியமையாத கலப்பு மணத்தை இம்மாநாடு ஆதரிக்கின்றது.

4. தமிழ் மாகாணத்தில் எல்லாப் பள்ளிகளிலும் தமிழ் மொழியை கட்டாயப் பாடமாக்க வேண்டுமென்று அரசாங்கத்தாரை இம்மாநாடு கேட்டுக்கொள்வதுடன், பிறமொழிகள் தமிழ் மொழிக்கு விரோதமாகப் பள்ளிகளின் கட்டாயப் பாடமாக வைக்கக்கூடாதெனத் தீர்மானிக்கிறது.

5. சென்னையில் முதலாவது மாகாண நீதிபதியாகவிருக்கும் தோழர் அபாஸ் அலி அவர்கள், காலஞ்சென்ற பா.வே.மாணிக்க நாயக்கரவர்கட்குத் தமிழ் தெரியாது; அவர் தெலுங்கர் என்று கூறியதையும், நாடார் சமுகத்தைக் கேவலமான வார்த்தைகளால் கூறியதையும், தோழர் மு.இராகவையங்கார், தொல்காப்பியம் 2000 ஆண்டுகட்கு முற்பட்டது என்று கூறியதை மறுத்து 50 ஆண்டுகளுக்கு முற்பட்டதென்று கூறியதைக் கண்டிப்பதுடன், தமிழறிவும் நூலறிவும் இல்லாத ஒரு நீதிபதி தன்னளவுக்கு மீறிக் கோர்ட்டில் பேசி வருவதை அரசாங்கத்தாரும், ஹைக்கோர்ட்டாரும் கவனித்து ஆவன செய்யும்படி இம்மாநாடு தீர்மானிக்கிறது.[2]


                                                            ‘குடிஅரசு’ (நவம்பர். 20, 1938)


தமிழ்நாட்டுப் பெண்கள் மாநாட்டில் 'பெரியார்' பட்டம் வழங்கல்
                       திருவல்லிக்கேணியில் தமிழர் பெரும் படை (13.11.1938)
தமிழ்நாட்டுப் பெண்கள் மாநாடு குறித்து முன் அறிவிப்பு


அடிக்குறிப்புகள் :

1.சுயமரியாதை இயக்க நூற்றாண்டு தந்தை பெரியார் 146 ஆம் ஆண்டு பிறந்தநாள் மலர் 17.09.2004, பக்கம்-178,179 [விடுதலை]


2.  ‘குடிஅரசு’ (நவம்பர். 20, 1938)






சனி, 14 நவம்பர், 2026

தேவதாசி ஒழிப்புச் சட்டம் கடந்து வந்த பாதை

 தேவதாசி ஒழிப்புச் சட்டம் கடந்து வந்த பாதை


இந்துக் கோயில்களில் பெண்களுக்கு பொட்டுக் கட்டி விட்டு வைப்பதால் நாட்டில் விபசாரத் தனத்திற்கு செல்வாக்கும் மதிப்பும் ஏற்பட ஏதுவாய் இருப்பதால் அத்தகைய செயல்கள் நடக்காமல் தடுக்கும் நோக்கத்தோடு திருமதி. முத்துலட்சுமி அம்மாள் அவர்களால் 1930 இல் ஒரு சட்டம் தயார் செய்யப்பட்டு சென்னை மாகாண சட்டசபைக்கு அனுப்பப்பட்டது. இச்சமூக கொடுமையை ஒழிக்க 1968ஆம் ஆண்டு முதலே பல்வேறு காலகட்டங்களில் முயற்சிகள் மேற்கொள்ளப்பட்டும் எவ்விதப் பயனும் ஏற்படவில்லை. 1924ஆம் ஆண்டு நிறைவேற்றப்பட்ட சட்டத்தின்படி 14 வயதுக்கு கீழ்ப்பட்ட பெண்களுக்கே பொட்டுக் கட்ட வேண்டும் என்றிருந்த வழக்கத்தை மாற்றி. 16 வயதுக்கு உட்பட்ட பெண்களுக்கு பொட்டுக் கட்டுவது தண்டனைக்குரிய குற்றமென்று ஆக்கப்பட்டதோடு, அதற்கென இந்தியன் பீனல் கோடு 372, 373 சட்டங்கள் திருத்தப்பட்டன. இக்கொடுமை யிலிருந்து பெண் சமுதாயத்திற்கு நிரந்தரத் தீர்வு காண டாக்டர் முத்துலட்சுமி அம்மாள் தீவிர முயற்சி எடுத்துக் கொண்டார் (23.3:1930) டாக்டர் முத்துலட்சுமி அம்மாள் கொண்டு வந்த மசோதாவில் பொட்டுக் கட்டும் வழக்கத்தை சட்டப்படி குற்றமாக்கவும், பொட்டுக் கட்டி விடப்பட்ட பெண்கள் திருமணம் செய்து கொள்ள சட்டப்படி உரிமை அளிக்கவும், பொட்டுக் கட்டுதல் முதலிய சடங்குகளை மேற்கொள்வோரைச் சட்டப்படி தண்டிக்கவும் வழிவகை செய்யப்பட்டிருந்தது.


'குடிஅரசு'- 30.03.1930


டாக்டர் முத்துலட்சுமி அம்மாளின் மசோதா சட்டசபையில் விவாதத்திற்கு வந்தபோது சட்டசபை உறுப்பினர்கள் பலர் ஆட்சேபனை தெரிவித்தனர். எனவே, பொதுமக்களின் அபிப்பிராயத்தை அறிந்து அதன்படி முடிவெடுக்கத் தீர்மானிக்கப்பட்டது. அதன்படி அம்மசோதாவின் நகல் ஒன்றை பெரியாருக்கு அனுப்பி அவரது அபிப்பிராயத்தைக் கேட்டனர். நீண்ட காலமாகவே இருந்து வரும் இக் கொடுமைக்கு தீர்வு காண வேண்டிய அரசாங்கமே. இது விஷயமாக பொதுமக்களின் அபிப்பிராயத்தைக் கேட்பது கோமாளித்தனமானது என்றார் பெரியார். பொதுமக்களின் அபிப்பிராயத்திற்கு அனுப்புவது என்னும் பேரால் ஆட்சேபனைகளை கிளப்பி அச்சட்டம் நிறைவேறுவதற்குத் தடையாகவிருந்த சட்டசபை மெம்பர்களையும் ஜஸ்டிஸ் கட்சியை சேர்ந்த உறுப்பினர்கள் அதற்கு ஆதரவாக ஓட்டளித்ததையும் வன்மையாகக் கண்டித்தார். அச்சட்டம் நிறைவேறாவிட்டால் அரசாங்கத்தாரும் ஜஸ்டிஸ் கட்சியாரும் பொதுமக்களின் நம்பிக்கையை இழக்க நேரிடும் என எச்சரித்தார்


'குடிஅரசு' - 23.03.1930


ஒவ்வொரு ஊரிலும் பொதுக்கூட்டம் கூட்டி அம் மசோதாவிற்கு ஆதரவாக தீர்மானங்கள் நிறைவேற்றி சட்டசபை காரியதரிசிக்கு பொதுமக்கள் அனுப்பி வைக்க வேண்டுமென்று பெரியார் கேட்டுக்கொண்டார்.


'குடிஅரசு' - 30.03.1930


மேற்படி மசோதா சம்பந்தமாக தமது அபிப்பிராயத்தைத் தெரிவித்துச் சட்டசபை காரியதரிசிக்கு, பெரியார் அனுப்பிய கடிதத்தில், இந்துக் கோயில்களில் சில பெண்களைப் பொட்டுக்கட்டி விடுவதால் அவர்கள் விபசாரிகளாகவும் அதன்மூலம் மேக வியாதி பரவவும் ஏதுவாயிருப்பதால் அதனைத் தடுக்க வேண்டியது அவசியம் என்றும், டாக்டர் முத்துலட்சுமி அம்மாள் மசோதா மதத்தின் பேரால் விபசாரம் பரவாமல் தடுக்க வகை செய்கிறது என்றும், மைனர் பெண்களுக்குப் பொட்டுக் கட்டக் கூடாதென்று ஏற்கெனவே சட்டம் இயற்றப்பட்டு அதன்மூலம் மத விதிகள் மீறப்பட்டு விட்டதால் சாத்திரங்களுக்கு பயந்து அரசாங்கம் சட்டமியற்றுவதிலிருந்து பின்வாங்கக் கூடாதென்றும். இந்து சமூக சுயமரியாதையை உத்தேசித்து தாம் அம்மசோதாவை மனப்பூர்வமாக ஆதரிப்பதாகவும் குறிப்பிட்டார்.


'குடிஅரசு' -30.03.1930


11.5:1930இல் ஈரோடு இரண்டாவது சுயமரியாதை மாநாட்டையொட்டி டாக்டர் முத்துலட்சுமி அம்மாள் தலைமையில் நடைபெற்ற பெண்கள் மாநாட்டில் இந்திய சட்டசபையில் திரு ஜெயகர் அவர்களாலும் சென்னை சட்டசபையில் திருமதி முத்துலட்சுமி அவர்களாலும் குடிஅரசும், ரிவோல்ட்டும் ஏராளமாகச் சென்றன. அவ்விடங்களில் சுயமரியாதைச் சங்கங்கள் தோன்றின. வெளிநாடுகளிலிருந்து பெரியாருக்கும் அவரது தோழர்களுக்கும் அழைப்புகள் வந்தன. தமிழ்நாட்டிலும் மலையாளத்திலும் இவ்வியக்கம் மிகவும் வலுப்பெற்றது. அங்குள்ள ஈழவர்கள் அனைவரும் இதனை ஆதரித்தனர். 1930 ஜூலை மாதத்தில் திருநெல்வேலியில் நடைபெற்ற சுயமரியாதை மாநாட்டில் பெரியாரின் உருவப்படம் திறந்து வைக்கப்பட்டது. அவ்விழாவிற்கு முன்னாள் உயர் நீதிமன்ற நீதிபதியும் S.N.D.P. யோகம் என்ற ஈழவர் சங்கத்தின் காரியதரிசியுமான திரு.எம். கோவிந்தன் அவர்கள் தலைமை வகித்து பேசும்போது,


"கோட்டயத்தில் நடைபெற்ற S.N.D.P. மாநாட்டில் பத்தாயிரத்துக்கும் அதிகமான மக்களுக்கு இவர் சுயமரியாதை இயக்கத்தின் தத்துவங்களைப் பற்றி செய்த சொற்பொழிவை ஆதரித்தும் கொண்டு வரப்பட்ட தேவதாசி ஒழிப்புச் சட்டத்திற்கு ஆதரவு தெரிவித்தும், அவை விரைவில் சட்டமாக்கப்பட வேண்டுமெனவும் தீர்மானம் நிறைவேற்றப்பட்டது.


'குடிஅரசு' 18.5.1930


-தந்தை பெரியார் 146 ஆம் ஆண்டு பிறந்த நாள் ஆண்டு மலர், 17.09.2024, பக்கம்-142,143




ஞாயிறு, 8 நவம்பர், 2026

வீரமாமுனிவர்


தமிழ் எழுத்து சீர்திருத்த முன்னோடி..மெய்யெழுத்துகளுக்குப் புள்ளி வைக்கும் முறையை அறிமுகப்படுத்தியவர்..,...
தமிழுக்கு ஆற்றிய தொண்டுகள்..
வீரமாமுனிவர் (8/11/1680 - 4/2/1747)..
இத்தாலி நாட்டிலுள்ள கேசுதிகிலியோனில் பிறந்தார். இவரின் இயற்பெயர் "கான்ச்டன்டைன் சோசப்பு பெச்கி (Constantine Joseph Beschi)"..
இயேசு சபையைச் சேர்ந்த குரு, கிறித்தவ மதத்தைப் பரப்பும் நோக்கில், 1709ஆம் ஆண்டு இயேசுசபையில் குருவானபின், 1710 ஆம் ஆண்டு தமிழகத்துக்கு வந்தார்..

அவரின் பணிகள்..
தொன்னூல் விளக்கம் என்ற நூலில் எழுத்து, சொல், பொருள், யாப்பு, அணி ஆகிய ஐந்து இலக்கணங்களைத் தொகுத்தார்..

கொடுந்தமிழ் இலக்கணம் என்ற நூலில், தமிழில் முதல்முதலாகப் பேச்சுத்தமிழை விவரிக்க முனைந்தவர். வழக்கும் செய்யுளுமே ஒரு மொழியின் இலக்கணமாக அமையுமென்றாலும், இரட்டை வழக்கு மொழியான தமிழில், பேச்சுத் தமிழுக்கு இலக்கணம் அமைந்திராத காலத்தில் கொடுந்தமிழ் இலக்கணம் வகுத்தது சிறப்பான முயற்சி எனல் வேண்டும்..

திருக்குறளில் அறத்துப்பாலையும், பொருட்பாலையும் இலத்தீன் மொழியில் பெயர்த்தவர் வீரமாமுனிவர்..

உரைநடையில் வேத விளக்கம், வேதியர் ஒழுக்கம், ஞானக் கண்ணாடி, செந்தமிழ் இலக்கணம், பரமார்த்த குருவின் கதை, வாமன் கதை ஆகிய நூல்களைப் படைத்தார்...

திருக்காவல் ஊர்க் கலம்பகம், கித்தேரி அம்மன் அம்மானை இவரது பிற நூல்கள்..

1728-இல் புதுவையில் இவரின் "பரமார்த்த குருவின் கதை" என்ற நூல் முதல்முறையாக இவரால் அச்சிட்டு வெளியிடப்பட்டது. இந்த நகைச்சுவைக் கதைகள் Jean de la Fontaine (1621-1695) எனும் பிரன்சியரால் எழுதப்பட்டது.. ஐரோப்பாவில் பிரபலமாக இருந்ததை பெஸ்கி தமிழிலும் மொழிபெயர்த்தார் என்று சிலர் கருதுகின்றனர். இது தமிழில் முதல் முதலாக வந்த நகைச்சுவை இலக்கியம் ஆகும்..

காவியத்தில் தேம்பாவணி இவர் இயற்றியது. மூன்று காண்டங்களில் 36 படலங்களைக் கொண்டு மொத்தமாக 3615 விருத்தம்|விருத்தப் பாக்களால் ஆனது இந்தக் காவியம். இதிலும் ஒரு சிறப்பு இருக்கிறது. பின்னிணைப்பாக யாப்பு வடிவங்களை அளித்திருக்கிறார். தமிழில் அமைந்த காப்பியங்களிலேயே, தமிழைத் தாய்மொழியாகக் கொள்ளாத வெளிநாட்டவர் ஒருவரால் இயற்றப்பட்டது எனும் பெருமை தேம்பாவணிக்கே உண்டு...

வீரமாமுனிவரைப் போல, வேறெந்தக் காப்பியப் புலவரும் சிற்றிலக்கியம், அகராதி, இலக்கணம் உரைநடை எனப் பிற இலக்கிய வகைகளில் நூல்கள் படைத்தாரல்லர்..

இவர் பல மருத்துவ நூல்களை எழுதியுள்ளதாக குறிப்புள்ளது. இந்நூல்கள் பாடல் வடிவில் உள்ளன.
நசகாண்டம்.
நவரத்தின சுருக்க மாலை.
மகா வீாிய சிந்தாமணி.
வைதிய சிந்தாமணி.
சுரமஞ்சாி.
பூவரசங்காய் எண்ணெய்.
மேகநாதத்தைலம் கலிவெண்பா.
பஞ்சாட்சர மூலிகை எண்ணெய்(ஆனந்தகளிப்பு).
சத்துருசங்கார எண்ணெய்(நொண்டிச் சிந்து).
வீரமெழுகு.
முப்புசூத்திரம்(நொண்டிச் சிந்து).
அனுபோகவைத்திய சிகாமணி.
வீாிய சிந்தாமணி இரண்டாம் பாகம்.
குணவாடகம்.
நிலக்கண்ணடாடி..

திங்கள், 2 நவம்பர், 2026

கடவுள் மறுப்பு தத்துவம்



 1967 ஆம் ஆண்டு மே 24இல் கடவுள் மறுப்பு வாசகங்கள் அறிவு ஆசான் தந்தை பெரியார் அவர்களால் உலகுக்குப் பிரகடனப்படுத்தப்பட்டதாகும்.

அன்றைய தஞ்சாவூர் மாவட்டம் (இப்பொழுது திருவாரூர் மாவட்டம்) திருமதிக் குன்னம் விடயபுரம் என்னும் குக்கிராமத்தில் உயர்திரு வி.அப்புசாமி (நாயுடு) அவர்களுக்குச் சொந்தமான பூங்குடில் பூங்காவில் சுயமரியாதை பகுத்தறிவுப் பிரச்சாரப் பள்ளி தொடக்க விழா நடைபெற்றது (24.5.1967).

திரு.வி. அப்புசாமி (நாயுடு) அவர்கள் வைதிகர். ஆனாலும், தந்தை பெரியார் அவர்களின்மீதும் ‘பக்தி’ கொண்டவர். தமது தோட்டத்தில் தந்தை பெரியார் அவர்கள் தங்குவதற்கென்றே பூங்குடில் பூங்கா (ஆசிரமம்போல்) அமைக்கப்பட்டு இருந்தது. கோடை வெயிலின் தாக்குதலில் தந்தை பெரியார் சிரமப்படக்கூடாது என்கிற அளவுக்கு அந்த நிலழக்கிழாரின் நெஞ்சம் தந்தை பெரியார்மீது பற்றும், மதிப்பும் கொண்டது.

முகாம் நடந்த அத்தனை நாள்களும் (மே 24 முதல் 31 வரை) தந்தை பெரியார் தங்கி இருந்து பயிற்சிப்பள்ளி மாணவர்களுக்கு வகுப்புகளை நடத்தினார்.

கடவுள் மறுப்பு, மத மறுப்பு, ஆத்மா மறுப்பு என்பதெல்லாம் தந்தை பெரியார் அவர்களிடம் நெடுங்காலமாகவே கொள்கையைச் சார்ந்தே இருந்து வந்தன என்றாலும், அந்தப் பயிற்சிப் பள்ளியில்தான் (24.5.1967) கடவுள் மறுப்பு வாசகங்களை முறைப்படுத்தி உலகுக்கே அறிவித்தார். அந்த வகையில் விடயபுரமும், இந்த நாளும் வரலாற்றுக் கல்வெட்டுகளாகும்.

இதுகுறித்து ‘விடுதலை’யில் (7.6.1967) தந்தை பெரியார் கையொப்பமிட்டு அறிக்கை ஒன்றினை வெளியிட்டுள்ளார்.

“கடவுள் மறுப்பு, என்பதை நமது இயக்க, கழக சம்பந்தமான எந்தக் கூட்ட நிகழ்ச்சிகளிலும்,

முதல் நிகழ்ச்சியாக “கடவுள் மறுப்பு’’ என்ற சொல்லைக் குறிப்பிட்டு, பிறகு மற்ற நிகழ்ச்சிகளைக் குறிப்பிடவேண்டும்.

பகுத்தறிவற்ற மூட நம்பிக்கை மக்கள் தங்கள் நிகழ்ச்சிகளில் முதலாவது நிகழ்ச்சியாக எப்படி “கடவுள் வணக்கம்’’ என்ற சொல்லைப் பயன்படுத்தி, அதை ஒரு நிகழ்ச்சியாக நடத்துகிறார்களோ, அதேபோல், நாம் கூட்டம் தொடங்கப்பட்டவுடன், முதல் நிகழ்ச்சியாக “கடவுள் மறுப்பு’’ என்று தலைவர் கூறவேண்டும்.

“கடவுள் இல்லை, கடவுள் இல்லை கடவுள் இல்லவே இல்லை’’ என்று கூறவேண்டும். கூட்டத்தில் உள்ள மக்கள் உட்கார்ந்தபடியே அதுபோலவே பின் ஒலி கொடுத்துக் கூறவேண்டும்’’ என்று தந்தை பெரியார் குறிப்பிட்டுள்ளார். அதனைக் கழகம் பின்பற்றி வருகிறது.

இது ஒரு முக்கியமான வரலாற்றுக் குறிப்பாகும்.

தந்தை பெரியார் சிலை பீடங்களில் பெரும்பாலும் இந்தக் கடவுள் மறுப்பு வாசகங்கள் பொறிக்கப்பட்டுள்ளது.

இந்த வாசகத்தை எதிர்த்து சென்னை உயர்நீதி மன்றத்தில் வழக்குத் தொடுக்கப்பட்டது.

தலைமை நீதிபதி எம்.எம். இஸ்மாயில் அவர்கள் யாருக்குச் சிலை வைக்கப்படுகிறதோ அவரின் கருத்துகளை சிலைப்பீடத்தில் பொறிக்கப்படுவது சரியானதே என்று வழக்கைத் தள்ளுபடி செய்தார்.

                 விடையபுரத்தில் உள்ள கடவுள் மறுப்பு கல்வெட்டு

குறிப்பு ஆதாரம்

1.  விடுதலை நாளேடு,24.5.2026

கடைசியாக திருத்தப்பட்ட நாள் 02.11.2026

செவ்வாய், 27 அக்டோபர், 2026

பண்பாட்டுப் புரட்சிக்கு வித்திட்ட முதல் சுயமரியாதைத் திருமணம் !

உயிரினங்களின் இயற்கைத் தன்மையில் எல்லா உயிர்களுக்கும் தனது இனத்தைப் பெருக்கும் தன்மை அமைந்துள்ளதை அறிவோம். இவ்வியற்கை நிகழ்வு பகுத்தறிவு உடைய மனிதர்களிடம் அறிவார்ந்து ஓங்கி வளர்ந்து, தனக்குத் தேவையான விரும்பிய துணையை ஏற்று வாழும் அறிவார்ந்த முறை வளர்ந்து சிறந்ததாகும்.

அதன் தொடர்ச்சியாக தனக்குரிய துணையை அடையாளப்படுத்தி ஒன்றி வாழும் முறையில் தலைவன், தலைவி என்ற நிலையில் தமிழர்கள் பண்பட்ட பண்பாட்டு வாழ்வை வகைப்படுத்தி அமைத்துக்கொண்டனர்.

தமிழர் திருமணம்:

தமிழர்களின் அகவாழ்க்கையை அகநானூற்றில் இடம்பெறும் பாடல் மூலம் அறியலாம். அவ்வகையில் அகப்பாடல் 86 மற்றும் 136 ஆகிய இரு பாடல்களும் தமிழர்களின் திருமண முறையைச் சிறப்பாகக் கூறுவதைப் பார்க்க முடிகிறது.

ஆகப் பழமையாக தமிழர் திருமண முறைக்கு “வதுவை மணம்” என்று “விற்றூற்று மூதையினனார்” பாடிய அகப்பாடல் 136 கூறுகிறது.

தொல்காப்பியக் கற்பியல் சூத்திரத்திலிருந்து (செய்யுள் 86) உரையாசிரியரும் வதுவை மணமுறை குறித்துக் குறிப்பிடுகிறார்.

சுயமரியாதைத் திருமணம்:

தமிழர் திருமண முறையில் தோற்றமும் – சிறப்பும் இவ்வாறிருக்க, இன்றைய புரோகித திருமண முறையில் காணப்படும் வடமொழி மந்திரம், புரோகிதர், எரிஓம்பல், தீவலம், பொரிமுகந்து போடல், அம்மி மிதித்தல், அருந்ததி பார்த்தல், தாலி கட்டுதல், கோத்திரம் கூறல், காசி யாத்திரை போன்றவைகள் எதுவும் பழந்தமிழர் திருமண முறையில் அறவே இல்லை. திரு. பி.டி. சீனிவாச அய்யங்கார் எழுதிய பண்டைத் தமிழர் வரலாறு, டாக்டர் கே.கே. பிள்ளை எழுதிய தமிழக வரலாறு மக்களும் பண்பாடும் (பக்கம் 131-132) ஆகிய நூல்கள் இதற்கான மறுக்க முடியாத ஆதாரச் சான்றாகும் என்று சுயமரியதைத் திருமணம் தத்துவமும் வரலாறும் எனும் நூலில் திராவிடர் கழகத் தலைவர் ஆசிரியர் டாக்டர் கி. வீரமணி அவர்கள் குறிப்பிட்டுள்ளார்.

பெரியார் காட்டும் மணமுறை:

தமிழர்களின் திருமண முறை இப்படி இருக்கும் நிலையில் ஆரியர்களின் திருமண முறையான கன்னிகாதானம் – ஆரியப் பண்பாட்டுப் படையெடுப்பின் வழியாக திராவிடர்களிடம் திணிக்கப்பட்டுள்ளது. தமிழர் திருமண முறை ஒழிந்த நிலையில் கோலோச்சிய புரோகித திருமண முறையால் பெண்ணடிமை, ஜாதி, பார்ப்பன மேலாதிக்கம், மூடநம்பிக்கை, பஞ்சம – சூத்திர இழிநிலைகள், சமஸ்கிருத மயம் எனப் பலகொடுமைகளைக் கண்ட தந்தை பெரியார் தமிழர்களின் மொழி – இனம் ஆகியவற்றின் சுயமரியாதையைப் பாதுகாக்கவும், ஜாதி – வர்ண இழிவைப் போற்றும், கடவுள் மத மூடநம்பிக்கைகளை ஒழிக்கவும், பார்ப்பன ஆதிக்கத்திலிருந்து திராவிடர்களை விடுதலை அடையச் செய்யும் “சுயமரியாதைத் திருமணம்” என்ற புரட்சிகரமான திருமண முறையை உருவாக்கினார். இத்திருமண முறையானது ஆரியர்கள் எண்வகைத் திருமண முறைகளான பைசாசு, ராட்சசு, அசுர, காந்தர்வ, பிரம்ம, தெய்வ, பிரஜாத்திய, ஆர்ஷ என்பனவற்றிற்கு எதிரான, தமிழர்களுக்குரியனவான அறிவார்ந்த திருமண முறையாகும். பண்டைய தமிழர் திருமண முறை உணர்வு சார்ந்தது. சுயமரியாதைத் திருமணம் என்பது உணர்வினைக் கடந்து உரிமையோடு அறிவு சார்ந்தது ஆகும்.

முதல் சுயமரியாதைத் திருமணம்:

சுயமரியாதைத் திருமண முறையை தந்தை பெரியார் உருவாக்கி, மக்களிடையே அறிமுகப்படுத்தி மாபெரும் பிரச்சாரத்தைச் செய்திட்டார். அதன் விளைவாக இத்திருமண முறை தமிழர்களால் ஏற்கப்பட்டு பல்லாயிரக்கணக்கில் – இலட்சக்கணக்கில் நடைபெற்றுள்ளது – நடைபெற்று வருகிறது. என்றாலும், பெரியாரின் புரட்சிகரமான சுயமரியாதைத் திருமணத்தை ஏற்று செய்து கொண்டவர்கள் – முதன்முதல் நடந்த  அத்திருமணத்தின் சிறப்பு முக்கியத்துவத்தை அறிந்து கொள்வது மிகவும் முக்கியமானதாகும். மே திங்களில் அதுகுறித்து இக்கட்டுரை வரைவதும் சாலப்பொருத்தமாகும். ஆம், மே மாதத்தில் 28.05.1928ஆம் ஆண்டு தான் தமிழர் வரலாற்றில் – தமிழ்நாட்டில் சமூக அரசியலில், திராவிடர் இனத்திற்கு ஒரு பெரும் திருப்புமுனையான சுயமரியாதைத் திருமண முறையின் முதல் திருமணம் நடைபெற்றது.

முதல் சுயமரியாதைத் திருமணம் நடைபெற்ற சுக்கிலநத்தம்

தமிழ்நாட்டின் அன்றைய இராமநாதபுரம் மாவட்டத்திலிருந்த அருப்புக்கோட்டைக்கு அருகில் இரண்டு கிலோ மீட்டர் தொலைவிலுள்ள “சுக்கிலநத்தம்” எனும் சிற்றூரில் தான் முதல் சுயமரியாதைத் திருமணம் நடைபெற்றது.

தந்தை பெரியார் உருவாக்கிய சுயமரியாதை இயக்கத்தின் தாக்கத்தால் அதில் தன்னை இணைத்துக்கொண்ட பெரியாரின் தொண்டர் துரைசாமி ரெட்டியார் என்ற சுப்பாரெட்டியாரின் மகன் அரங்கசாமி ரெட்டியாருக்கும் – அழகர்சாமி ரெட்டியார் மகள் நாகம்மாள் – ஸ்ரீநிவாச ரெட்டியார் மகள் ரத்தினத்தாயம்மாள் ஆகிய இருவருக்கும் திருமணம் 28.5.1928 காலை 10.00 மணிக்கு நடைபெற்றது. மணமகன் அரங்கசாமியை இரு பெண்கள் மணக்க விரும்பியதால் (உறவுக்காரர்கள்) ஒரே நேரத்தில் இருவரை மணமுடிக்கும் நிகழ்வு தந்தை பெரியார் தலைமையில் நடைபெற்றது.

மற்றொரு திருமண நிகழ்ச்சியும் அதே மேடையில் காலை 11.00 மணிக்கு நடைபெற்றது. சுப்பாரெட்டியாரின் சகலப்பாடி நாராயண ரெட்டியாரின் மகன் கோபால்சாமி ரெட்டியார் திருமணமும் முதல் திருமணம் போல் இரண்டு பெண்களை சிரோண்மணி அம்மாள், கமலத்தம்மாள் ஆகியவர்களையும் துணையாக்கிக்கொள்ளும் நிகழ்வு சுயமரியாதைத் திருமண முறையில் பெரியார் தலைமையில் நடைபெற்றது.

இத்திருமண முறையைப் பார்த்துக் கொண்டிருந்த மாரி ரெட்டியார் என்பவர் பார்ப்பனர் வைத்து திருமணம் செய்ய இருந்த தனது எண்ணத்தை மாற்றிக் கொண்டு, அதே மேடையில், சுப்பா ரெட்டியாரிடம் அனுமதி பெற்று தனது திருமணத்தை மூன்றாவது திருமணமாக நடத்திக் கொண்டார். மாரி ரெட்டியார் – சீதாலட்சுமி அம்மாள் திருமணம் அதே மேடையில் நண்பகல் 12.00 மணிக்கு நடைபெற்றது.

மூன்று திருமணங்களையும் தந்தை பெரியார் தலைமை ஏற்று, ஒரே நாளில், ஒரே மேடையில் நடத்தி வைத்திட்டார். திருமண விழாவில் கலந்துக் கொண்டு சென்னை ஜே.எஸ்.கண்ணப்பர், சிதம்பரம் என்.தண்டபாணிப் பிள்ளை, திருச்சி கி.ஆ.பெ.விசுவநாதம் பிள்ளை, பட்டுக்கோட்டை அழகிரிசாமி ஆகியோர் கலந்துகொண்டு மணமக்களை வாழ்த்திப் பேசினர்.

ஒமம் வளர்க்கப்படாமல், திருவிளக்கு ஏற்றப்படாமல், கற்பூரம் கொளுத்தாமல், தீவலம் சுற்றாமல், அம்மி மிதித்து – அருந்ததி பார்க்காமல் திருமணம் நடந்தது. தாலி கட்டும் போது சுயமரியாதைக்கு ஜே! வைக்கம் வீரருக்கு ஜே! என்று மக்கள் முழக்கமிட்டனர். முதன் முதலில் நடைபெறும் இத்திருமணத்தில் தாலி கட்டுவது இருந்தபோதும், புரோகிதர் இன்றி நடைபெற்றதே பெரும் மாற்றாக கருதப்பட்டு நடந்தேறியது.

தந்தை பெரியார் மூன்று திருமணங்களையும் நடத்திவிட்டு மறுநாள் 29.01.1928 காலை புறப்படும்போது சுப்பா ரெட்டியார் பெரியாரிடம், சுக்கிலநத்தத்தைச் சுற்றியுள்ள 116 ஊர்களிலும், சுயமரியாதைத் திருமணத்தை மட்டுமே செய்தி உறுதி கொண்டுள்ளோம் என்று கூறி வழியனுப்பியிருக்கிறார். இத்திருமண விழாவில் 5000க்கும் மேற்பட்டோர் கலந்துகொண்டு சிறப்பித்திருக்கிறார்கள்.


சுயமரியாதைத் திருமணச் சட்டம்:

1928இல் எந்தச் சட்ட அங்கீகாரம் இல்லாது நடைபெற்ற சுயமரியாதைத் திருமணம் சட்டப்படி செல்லத்தக்கது இல்லை சென்னை உயர்நீதி மன்றத்தால் தீர்ப்பளிக்கப்பட்டது. ஆனாலும் சுயமரியாதைத் தொண்டர்கள் தொடர்ந்து செய்து வந்தனர். இந்த நிலையில் பேரறிஞர் அண்ணா ஆட்சிக்கு வந்ததும் 27.11.1968இல் தமிழ்நாடு சட்டமன்றத்தில் சுயமரியாதைத் திருமணம் செல்லும் எனும் சட்டமுன்வரைவை கொண்டு வந்து நிறைவேற்றி 17.01.1968இல் குடியரசுத் தலைவரின் ஒப்புதல் பெற்று, 20.01.1968 சென்னை அரசிதழில் வெளியிடப்பட்டது.

இச்சட்டம் நிறைவேற்றப்பட்டதால், இத்திருமணத்திற்கு சட்ட அங்கீகாரம் கிடைத்தது என்ற மகிழ்ச்சியோடு, இரட்டை மகிழ்ச்சியாக சட்டம் நிறைவேறுவதற்கு முன் நடைபெற்ற அனைத்து சுயமரியாதைத் திருமணங்களும் செல்லத்தக்கது என்றானது. சட்டம் பின் தேதி
யிட்டு நடைமுறைப்படுத்தப்பட்டு முன்னர் நடந்த திருமணங்கள் அனைத்தும் செல்லத்தக்கதாக அமைந்துவிட்டதால் நாடு மகிழ்ந்தது. மொழி – இன – மானம் காக்கப்பட்டது.

அயல்நாடுகளும் அங்கீகரிக்கிறது:

1968இல் தமிழ்நாட்டில் சட்டமாக்கப்பட்ட இத்திருமண முறைக்கு இன்று சிங்கப்பூர், மலேசியா, பிரிட்டன், அமெரிக்கா ஆகிய நாடுகள் அங்கீ காரம் தந்து சுயமரியாதைத் திருமணம் ஏற்கப் பட்டுள்ளது. வெளிநாடுகளிலும், எந்நாட்டிற்கும் பொருந்தும் அறிவார்ந்த முறையான இத்திருமண முறையைப் போற்றிப் பரப்பிடுவோம். சுயமரியாதை வாழ்க்கைப் பாதையில் பயணிப்போம்.|


-  கட்டுரை: முனைவர் க.அன்பழகன்

-உண்மை  இதழ்,16-31.05.2026

திங்கள், 19 அக்டோபர், 2026

ஆற்காடு இரட்டையர்

 

அகிலம் வியக்கும் ஆற்றல்மிகு ஆற்காடு இரட்டையர்

1887ஆம் ஆண்டு அக்டோபர் திங்கள் 14ஆம் நாள் இராமசாமி (முதலியார்), இலட்சுமணசாமி (முதலியார்) ஆகியோர் அடுத்தடுத்துப் பிறந்த இரட்டையர்கள்.

தந்தையார் குப்புசாமி (முதலியார்), தாயார் சீத்தம்மாள். குழந்தைகளுக்கு 2 வயது ஆகும்போது தாயர் இயற்கையெய்தினார். பிறகு தந்தையாரின் அரவணைப்பில் மழலைகள் வளர்ந்தனர். ஆனால், தந்தை தமது 52ஆவது வயதில் மறைந்தார். ஆகவே, இரட்டையர்கள் அவர்களது தமையனார் துரைசாமி (முதலியார்) பாதுகாப்பில் வளர்ந்தனர். இருவரும் சென்னை கிருத்துவக் கல்லூரியில் (அப்போது பாரி முனையில் இருந்தது.) சேர்ந்து அங்குள்ள “கைந்நஸ்’’ விடுதியில் படித்தனர்.

கல்வி கற்க தொடங்கிய நாள் முதல் இருவரும் ஒன்றாகவே படித்து வந்தனர். பிறகு மேற்படிப்பிற்காக வேறு வேறு கல்லூரிகளுக்கு செல்ல வேண்டியவர்களாகினர். மூத்தவர் இராமசாமி சட்டக் கல்லூரியில் சேர்ந்து பி.எல். பட்டம் பெற்று வழக்கறிஞராக சென்னை உயர்நீதி மன்றத்தில் பதிவு செய்துகொண்டார்.

இளையவர் இலட்சுமணசாமி சென்னை மருத்துவக் கல்லூரியில் சேர்ந்து எல்.எம்.அண்டு எஸ். பட்டம் பெற்று அரசு மருத்துவமனையில் தமது பணியைத் தொடங்கினார். இரட்டையர்கள் வேலூரை அடுத்த ஆற்காடு நகரத்தைச் சேர்ந்தவர்கள் என்பதால் ஆற்காடு சகோதரர்கள் என்றழைக்கப்பட்டனர்.


ஆ.இராமசாமி (முதலியார்)

வக்கீல் தொழிலில் திறமையாக பணிபுரிந்து நல்ல வருமானம் ஈட்டிய நிலையில் சமூகத்தில் நீதி நிலைநாட்டப்படாததைக் கண்டு அரசியலில் ஈடுபட்டார். “ஜஸ்டிஸ்’’ கட்சியில் சேர்ந்து மக்களின் நலனுக்காகப் பாடுபட்டார். பிறகு, அரசால் பல உயர்பதவிகள் அளிக்கப்பட்டு அரிய சேவைகள் புரிந்தார். அவர் புகழ் உள்நாட்டில் மட்டுமில்லாது வெளிநாடுகளிலும் பரவியது. 1945இல் அய்க்கிய நாடுகள் சபை அமைந்தபோது, இந்தியாவின் சார்பில் கையெழுத்திட்டவர் திரு.இராமசாமி. அய்தராபாத் பிரச்சினையைக் கையாள அன்றைய உள்துறை அமைச்சர் பட்டேல் அவர்களால் தேர்ந்தெடுக்கப்பட்டு ஸ்விட்ஜர்லாந்து சென்று அங்கு அய்க்கிய நாடுகள் பாதுகாப்பு சபையில் இந்தியாவின் சார்பில் வாதாடி அய்தராபாத் நகரத்தை இந்தியாவுடன் இணைத்த பெருமை அவருடையதே.

சென்னை மாநகரத்தின் தலைவராய் பொறுப்பேற்றவுடன், மாநகராட்சிப் பள்ளிகளில் மதிய உணவு திட்டத்தைக் கொண்டுவந்தார்.

பிறகு மத்திய அரசால் பல உயர்பதவிகள் அளிக்கப்பட்டு சிறந்த பணி ஆற்றினார். பல வெளிநாட்டுப் பல்கலைக்கழகங்கள் அவருக்கு கௌரவ டாக்டர் பட்டம் அளித்து பெருமைப்படுத்தின. மேலும், இந்திய அரசு சார்பில் பத்மவிபூஷன் பட்டம் அளிக்கப்பட்டது.

இரயில் நிலையத்தில் பார்ப்பனர், பார்ப்பனர் அல்லாதார்க்கு தனித்தனியே சிற்றுண்டிச் சாலை வைத்துள்ளதை எதிர்த்து தந்தை பெரியார் அவர்கள் போராட்டத்தில் இறங்கியபோது மத்திய அரசின் வர்த்தக அமைச்சராய் இருந்த சர்.ஏ.இராமசாமி அவர்கள் இந்த வேறுபாட்டை அகற்ற (20.03.1941) உத்தரவிட்டார்.


வாழ்க்கைக் குறிப்பு

 சட்டப்படிப்பு முடிந்தபின், அரசியலில் ஈடுபடுவதற்கு முன்பு வழக்குரைஞராகப் பணியாற்றினார். 1920இல் சென்னை சட்ட மன்ற உறுப்பினராகத் தேர்ந்தெடுக்கப்பட்டார். 1920–1926; 1931–1934 காலகட்டங்களில் சட்ட மன்ற உறுப்பினராக இருந்த ராமசாமி முதலியார் 1934இல் இடம்பெற்ற சென்னை மாகாணச் சட்டமன்றத் தேர்தலில், எஸ். சத்தியமூர்த்தியிடம் தோற்றுப் போனார்.

1910-ல், காமாட்சி என்பவரைத் திருமணம் செய்து கொண்டார். இத்தம்பதியருக்கு ஏ.ஆர்.கிருஷ்ணமூர்த்தி, ஏ.ஆர்.தாமோதரன் என இரண்டு மகன்களும், இரண்டு மகள்களும் பிறந்தனர். மாபெரும் சாதனைகளைப் படைத்த ராமசாமி 17. சூலை 1976 அன்று தனது 88-வது வயதில் காலமானார்.

நீதிக்கட்சி

இராமசாமி முதலியார், நீதிக்கட்சி ஆரம்பிக்கப்பட்ட காலத்திலிருந்தே (1917) கட்சியில் இருந்தவர். நீதிக்கட்சியின் பொதுச்செயலாளராகப் பொறுப்பு வகித்தார். சூலை 1918இல் இராமசாமி முதலியார், மருத்துவர் டி. எம். நாயர், கூர்ம வெங்கட ரெட்டி நாயுடு ஆகிய மூவரடங்கிய குழு ஒன்று இங்கிலாந்து சென்று நீதிக்கட்சி சார்பில் வகுப்புவாரியான பிரதிநிதித்துவத்தை வலியுறுத்தி அதற்கான சான்றுகளைப் பிரித்தானிய நாடாளுமன்றச் சீர்திருத்தச் செயற்குழு முன் சமர்ப்பித்தது.இவர் நீதிக்கட்சியில் படிப்படியாக முன்னேறி அக்கட்சியின் மூளையென்று கருதப்படும் அளவுக்கு உயர்ந்தார. இந்தியாவில் வெவ்வேறு பகுதிகளிலும் உள்ள பார்ப்பனரல்லாதோரை ஒன்றிணைக்கவும் அவர்களையும் உள்ளடக்கி மாநாடுகளை நடத்தவும் முயற்சிகள் மேற்கொண்டார். இவர் ஒரு சிறந்த பேச்சாளர். இவரது பேச்சுக்கள் ஊக்கம் மிக்கவையாக அமைந்திருந்தன.

நவம்பர் 8, 1926இல் நடைபெற்ற சென்னை சட்டமன்றத் தேர்தலில் நீதிக்கட்சி 98இற்கு 21 இடங்களை மட்டுமே பிடித்து மிகப் பெரிய தோல்வியைத் தழுவியது.தோல்வியடைந்தவர்களில் முதலியாரும் ஒருவர். தற்காலிகமாக அரசியலில் இருந்து ஓய்வு பெற்று பி. என். ராமன் பிள்ளைக்குப் பதில் நீதிக்கட்சியின் ஜஸ்டிஸ் செய்தித் தாளின் பொறுப்பை ஏற்று நடத்தினார். இவரது மேற்பார்வையின் கீழ் அச்செய்தித் தாள் பிரபலமடைந்து அதன் விற்பனையும் அதிகமானது.மார்ச் 1, 1929இல் இவரும் நீதிக்கட்சியின் மற்றொரு முக்கியத் தலைவருமான சர் ஏ. டி. பன்னீர்செல்வமும் நீதிக்கட்சி சார்பில் கோரிக்கைகளை சைமன் குழு முன் வைத்தனர். இவர் 1928 முதல் 1930 வரை சென்னை நகர மேயராகப் பணிபுரிந்தார். 1935இல் அரசின் வரித்துறையில் நியமிக்கப்பட்டதால் ஜஸ்டிஸ் செய்தித் தாளின் ஆசிரியர் பொறுப்பிலிருந்து விலகினார். இவர் பிரித்தானிய அரசின் இந்தியத்துறை அமைச்சரின் செயற்குழு உறுப்பினராகவும் இருந்தார். பெப்ரவரி 25, 1937இல் பக்கிங்ஹாம் அரண்மனையில் இவருக்கு சர் பட்டம் வழங்கப்பட்டது.

அனைத்திந்தியப் பார்ப்பனரல்லாதோர் இயக்கம்

இராமசாமி முதலியாருக்கு ஷாகு மகாராஜுடனும் மகாராட்டிரப் பார்ப்பனரல்லாதோர் கூட்டத் தலைவர்களோடும் மற்ற வட இந்தியப் பார்ப்பனரல்லாதோர் கூட்டத் தலைவர்களோடும் நட்புமுறையிலான நல்ல உறவு இருந்தது. ராமசாமி முதலியார் இந்தியாவின் வெவ்வேறு பகுதிகளிலும் உள்ள பார்ப்பனரல்லாதோர் அமைப்புகளின் தலைவர்களை ஒருங்கிணைப்பதிலும் அவர்களுக்கான மாநாடுகள் நடத்துவதற்கும் உதவினார்.திசம்பர் 18, 1922இல் சதாராவில் இரண்டாம் இராஜாராமின் தலைமையில் நடந்த பார்ப்பனரல்லாதோர் மாநாட்டில் இவரும் பங்கேற்றார். திசம்பர் 26, 1924இல் பெல்காமில் நடந்த அனைத்திந்தியப் பார்ப்பனரல்லாதோர் மாநாட்டில் கலந்து கொண்டு இவர் ஆற்றிய சொற்பொழிவு அனைவராலும் பாராட்டிப் பேசப்பட்டது. பெப்ரவரி 8, 1925இல் நடந்த ஏழாவது பார்ப்பனரல்லாதோர் மாநாட்டில் கலந்து கொண்டு பார்ப்பனரல்லாதோர்களிடம் இருக்க வேண்டிய ஒற்றுமையின் அவசியத்தை வலியுறுத்திப் பேசினார்.

1925இல் சர் பி. டி. தியாகராய (செட்டி)யாரின் மறைவுக்குப்பின் ஷாகு மஹாராஜின் சத்ய ஷோதக் சமாஜையும் நீதிக்கட்சியையும் இணைக்கும் பாலமாக இருந்தவர் இராமசாமி முதலியார் ஒருவர் மட்டுமே. திசம்பர் 19, 1925இல் சென்னை விக்டோரியா மண்டபத்தில் அனைத்திந்தியப் பிராமணரல்லாதோர் மாநாடு நடத்த பனகல் அரசருக்குத் துணை புரிந்தார். திசம்பர் 26, 1925இல் இரண்டாவதாக மறுபடியும் ஒரு மாநாட்டை அமராவதியில் நடத்தினார். அது இரு தொடர்களாக நடந்தது. முதல் கூட்டத்தொடருக்குக் கோலாப்பூர் மகாராசாவும் இரண்டாவது தொடருக்குப் பனகல் அரசரும் தலைமை தாங்கினர்.

இரண்டாவது தொடரில் இராமசாமி  முதலியார் பேசியது:-

முதலியாரின் பேச்சைத் தி இந்து நாளிதழ், பிற மாகாணத்தில் தன்னை நிலை நிறுத்திக் கொள்ள வேண்டும் என்ற அவரது விருப்பம் இந்த அளவுக்கு அவரது கற்பனையைத் தூண்டியிருக்கிறது என விமர்சனம் செய்தது.

போர்க்கால அமைச்சரவையில்

1939இல் இரண்டாம் உலகப்போர் மூண்டபோது இராமசாமி முதலியார், ஆளுநரின் செயற்குழு உறுப்பினராக நியமிக்கப்பட்டார். ஜூன் 1942ல் அவருக்கு கே. சி. எசு. ஐ (KCSI) பட்டம் வழங்கப்பட்டது. சூலை 1942இல் பிரித்தானியப் பிரதம மந்திரி வின்ஸ்டன் சர்ச்சிலின் போர்க்கால அமைச்சரவைக்கு நியமிக்கப்பட்ட இரு இந்தியரில் இவரும் ஒருவர். பிரித்தானியரின் ஆட்சிக்குட்பட்ட மற்றப் பகுதிகளின் பிரதிநிதிகளுக்கு வழங்கப்பட்டிருந்த உரிமைகளும் சலுகைகளும் இவர்களுக்கும் சமமாக வழங்கப்பட்டிருந்த்து.

டாக்டர்

இரண்டாம் உலகப்போர் காலத்தில் இவர் ஆற்றிய தொண்டினைப் பாராட்டி ஆக்ஸ்போர்டு பல்கலைக்கழகம் இவருக்கு "டாக்டர் ஆப் சிவில் லா" (Doctor or Civil Law) என்னும் பட்டத்தை 1945 ஆம் ஆண்டில் வழங்கியது.

அய்க்கிய நாடுகள் பொருளாதார, சமூக மன்றத் (ECOSOC) தலைவராக

1945இல் ஏப்ரல் 25 முதல் சூன் 26 வரை சான் பிரான்சிஸ்கோவில் நடைபெற்ற அய்க்கிய நாடுகள் அவையின் மாநாட்டில் இந்தியப் பிரதிநிதியாக இராமசாமி முதலியார் கலந்து கொண்டார். அங்கு பொருளாதார, சமுதாயப் பிரச்சினைகளைப் பற்றி விவாதித்த செயற்குழுக் கூட்டதிற்குத் தலைமை தாங்கினார்.சனவரி 23, 1946 அன்று சர்ச் ஹவுஸ், இலண்டனில் நடைபெற்ற அய்க்கிய நாடுகள் பொருளாதார, சமூக மன்றக் கூட்டத்தில் மன்றத்தின் முதல் தலைவராகத் தேர்ந்தெடுக்கப்பட்டார். இராமசாமி முதலியாரின் தலைமையில் பெப்ரவரி 1946இல் நடந்த மன்றக் கூட்டத்தில் பன்னாட்டுச் சுகாதார மாநாடு ஒன்று நடத்தப்படவேண்டும் என்ற தீர்மானம் நிறைவேற்றப்பட்டது. சூன் 19, 1946இல் பன்னாட்டுச் சுகாதார மாநாடு நடந்தது. அதனை இராமசாமி முதலியார் தொடங்கி வைத்தார். அம்மாநாட்டிற்றான் உலக சுகாதார அமைப்பு (WHO) உருவானது. அவ்வமைப்பின் சட்டதிட்டங்கள் விவாதிக்கப்பட்டு 61 நாடுகளைச் சேர்ந்த பிரதிநிதிகளாலும் ஏற்றுக்கொள்ளப்பட்டன. பொருளாதார, சமூக மன்றத் தலைவராக ஓராண்டு பணிபுரிந்து பின் பணிக்காலம் முடிவடைந்ததால் இந்தியாவுக்குத் திரும்பி மைசூரின் முதலமைச்சராகப் (திவான்) பதவியேற்றார். மைசூர் மகாராஜா ஜயச்சாமராஜ வாடியாருக்கு சுதந்திர இந்தியாவுடன் இணைய வேண்டுமென ஆலோசனை கூறினார்.

திரு ஆ.இராமசாமியைப் பற்றி பெரியார் கூறியதாவது:

“இந்த நாட்டிலேயே அவர் ஒரு பெரிய மேதாவி. அதை யாரும் மறுக்க முடியாது. அவர் நம் நாட்டிலேயே உயர்ந்த அறிவும், திறமையும் உள்ள கெட்டிக்காரர். ஜாதிவெறி, ஜாதி ஆணவம், ‘தங்கள் ஜாதியைத் தவிர மற்ற ஜாதியாரை ஒழித்துக் கட்டுவதுதான் தம் ஜாதியின் தர்மம்’ என்று நினைத்துக் கொண்டிருக்கிற அக்கிரமம் இல்லாது இருக்குமானால் சர்.ஏ.இராமசாமி முதலியார் இன்றைய தினம் இந்திய நாட்டிற்கு ஜனாதிபதியாக இருக்க வேண்டியவர்.’’

வர்ணாசிரமம் ஒழியவும், பெண்கள் உரிமை பெறவும், அனைத்து ஜாதியினரும் கோயிலுக்குள் செல்லவும் அயராது பாடுபட்டவர்.


திரு.ஆ.இலட்சுமணசாமி (முதலியார்)


இளையவர் இலட்சுமணசாமி மருத்துவராகி சென்னை எழும்பூர் தாய்_சேய் மருத்துவமனையில் சேர்ந்து சிறந்த பணியாற்றி வந்தார்.

அன்றைய ஆங்கில ஆட்சியில் சென்னை மருத்துவக் கல்லூரியின் முதல்வர் பதவி ஆங்கிலேயர்களின் ஏகபோக உரிமையாக இருந்தது. ஆனால், ஆங்கிலேயர்-களைக் காட்டிலும் பல மடங்கு திறமைசாலி-யான இலட்சுமணசாமி முதலியார் அப்பதவிக்கு ஆங்கில அரசாலேயே நியமிக்கப்பட்டார். மருத்துவக் கல்லூரியின் முதல்வராக சிறந்த பணியாற்றினார்.

ஆகவே, அவர் சேவை கல்வியின் மற்ற துறைகளிலும் தொடர, 1942ஆம் ஆண்டு ஆகஸ்டு திங்கள் 19ஆம் நாள் சென்னை பல்கலைக்கழக துணைவேந்தராகத் தேர்ந்-தெடுக்கப்பட்டார். அதிலிருந்து 1969ஆம் ஆண்டு வரை 27 ஆண்டுகள் சென்னை பல்கலைக்கழக துணைவேந்தராக சிறந்த பணியாற்றினார்.

1946ஆம் ஆண்டு சென்னை சட்ட மேலவைக்கு கல்வியாளர்கள் தொகுதியிலிருந்து உறுப்பினராக தேர்ந்தெடுக்கப்பட்டார். பிறகு சட்ட மேலவை தலைவராகி, அரசுக்கு நல்ல பல ஆலோசனைகளை வழங்கினார்.

1952ஆம் ஆண்டு ஒரு அநியாயம் தமிழ்நாட்டில் நிகழ்ந்தது. அதுவே அப்பன் தொழிலை மகன் செய்ய வேண்டும் என்று கூறி இராசகோபாலாச்சாரியார் 6000 பள்ளிகளை இழுத்து மூடிவிட்டார். பல இலட்சக்கணக்கான மாணவர்களின் படிப்பு பாழானது. இதை பெரியார், “குலக்கல்வித் திட்டம்’’ என்று சாடி பெரும் போராட்டத்தில் இறங்கினார். நாடு முழுவதும் கொந்தளித்தது.

அப்போது மேலவையின் தலைவராக இருந்த இலட்சுமணசாமி, “இந்த கல்வித் திட்டத்தால் பெரும்பாலான சிறார்கள் படிப்பை இழந்துவிடுவர். பெண்களும் 10 வயதுக்குட்பட்ட சிறுவர்களும் பலர் அப்பன் தொழிலை செய்யாது கல்வி கற்கின்றனர். அவர்கள் எதிர்காலம் கல்வியில்லாமல் கேள்விக்குறியாகிவிடும்’’ என்ற தமது எதிர்ப்பைப் பதித்தார்.
ஆச்சாரியாருக்கு எதிர்ப்பு வலுக்கவே தமக்கு உடல்நலம் சரியில்லை என்று சாக்குபோக்குக் கூறி பதவியை விட்டு ஓடிவிட்டார். ஆனால், துரத்தப்பட்டார் என்பதே உண்மை!

இலட்சுமணசாமி இந்தியாவில் பல உயர்பதவிகளுக்குத் தேர்ந்தெடுக்கப்பட்டார். மேலும், அய்க்கிய நாடுகள் சபையின் உலக சுகாதார அமைப்பின் தலைவராகவும் தேர்ந்தெடுக்கப்பட்டு இந்தியாவிற்கே பெருமை சேர்த்தார்.

பல நாட்டு பல்கலைக்கழகங்கள் அவருக்கு கவுரவ டாக்டர் பட்டங்கள் வழங்கிச் சிறப்பித்தன. இந்திய அரசும் அவருக்கு 1963இல் பத்மவிபூஷன் பட்டம் வழங்கி பெருமைப்-படுத்தியது.
இலட்சுமணசாமி சிறந்த கட்டிடக் கலை நிபுணரும் ஆவார். சென்னை சேத்துப்பட்டில் இருக்கும் பச்சையப்பன் கல்லூரி, சென்னை பல்கலைக்கழக நூற்றாண்டு மண்டபம், அங்குள்ள பட்டமளிப்பு மண்டபம் (இப்போது தொலைதூரக் கல்வி இயக்கமும், பல பெரிய அரசு விழாக்களும் அங்கு நடத்தப்படுகிறது.) ஆகியவைகள் இலட்சுமணசாமியால் கட்டப்-பெற்றன.
சென்னை தரமணியில் இயங்கிவரும் அய்.அய்.டி. நிறுவனமும் இலட்சுமணசாமி முயற்சியால் கொண்டுவரப்பட்டு இன்றும் உலகளாவிய புகழ்பெற்று வருகிறது. அந்நிறு வனத்தில் இலட்சுணசாமி முதலியாரின் வெண்கல சிலை நிறுவப்பட்டு மரியாதை செலுத்தப்பட்டு வருகிறது.

ஆனால், இன்று பார்ப்பன ஆதிக்கத்தில் சிக்கிச் சீரழிகிறது.

அகில இந்திய பப்ளிக் சர்வீஸ் கமிஷன் தேர்வு இந்தியில் எழுதப்பட வேண்டும் என்ற உத்தரவை எதிர்த்து, ஆங்கிலத்தில் தென்னிந்திய மக்கள் எழுதும் வாய்ப்பைப் பெற்றுத் தந்தவர் இவர்.

ஆக்ஸ்போர்டு பல்கலைக்கழகம் இந்த இருவருக்கும் டாக்டர் பட்டம் வழங்கிச் சிறப்பித்தது.


குறிப்பு ஆதாரம் :

1.உண்மை இதழ், 1-15.10.2016

2.விக்கிப்பீடியா


கடைசியாக திருத்தப்பட்ட நாள் : 20.10.2026

தளபதி சி.டி நாயகம்

 

                      சுயமரியாதைப் போராட்டத் தளபதி சி.டி நாயகம்

தந்தை பெரியார் அவர்களது அடிநாள் தோழராக, தொண்டராக, நன்னம்பிக்கைக்குரியவராக வாழ்ந்த பெருந்தகையாளர் தெய்வநாயகம் அவர்கள் நெல்லை மாவட்டக் குலசேகரன் பட்டினத்தில் 7.10.1878இல் பிறந்து அவ்வூரி-லேயே கல்வி கற்றவர்.

சென்னைக்கு வந்து பிட்.டி.தியாகராயர் தாளாளராயிருந்து நடத்திவந்த ஆண்கள் உயர்நிலைப் பள்ளியில் பணியாற்றிக் கொண்டிருந்தபோது தென்னிந்திய நலவுரிமைச் சங்கப் பற்றுமேவியவராய், அதன்வழி சமுதாய மறுமலர்ச்சிப் படைக்கப் பாடுபடும் சுயமரி-யாதை இயக்க ஈடுபாடும் கொண்டார்.

தம் சொந்த முயற்சியில் சென்னையில் பொருளியற்றி கல்வி பெற்று, கூட்டுறவுத்துறை உதவிப் பதிவாளர்ப் பதவியில் அமர்ந்து, தம் நிலையை நன்குப் பயன்படுத்தி, நம் இன மக்களுக்கு என்னென்னவெல்லாம், எப்படி-யெப்படியெல்லாம் செய்யலாமோ அவற்றைச் செய்து காட்டினார். அரசுப் பணியிலிருந்து ஓய்வுபெற்ற மறுநொடியே தந்தை பெரியாரின் சுயமரியாதை இயக்கத்தில் தம்மை ஒப்படைத்துக்-கொண்டார். அய்யா கருத்துக்களைச் சொல்லி-விட்டால், நாயகம் அதை விளக்கிச் சொல்வார்; அதற்கு ஆதாரங்கள் விநாடியில் சேர்த்து-விடுவார்.

சுயமரியாதை மணங்கள் அவரால் நிறைய நடத்தப்பெற்றன. பல நிகழ்ச்சிகளில் கலந்து-கொண்டு இயக்கக் கொள்கைகட்கு அருமை-யான விளக்கங்கள் கொடுத்தார். முதலாம் இந்தி எதிர்ப்புப் போராட்டத்தின் முதல் ‘சர்வாதிகாரி’-யாகப் பொறுப்பேற்று நடத்திய வரலாற்றுக் கீர்த்தியை அடைந்தார். இப்போரில் கைதாகி 18 மாதச் சிறை வாழ்க்கைப்பட்டு, தம் உடல் நலம் பெரும் கேடுற்றும் இயக்கப் பிணைப்பைத் தளர்த்திக்கொள்ள நாயகம் முனைந்தது கிடையாது.

மூடநம்பிக்கைகளை உடைப்பது, பெண்ணுரிமைப் பேணுவது, பின்தங்கி-விட்டவர்களின் கல்வி ஆகிய நோக்கங்களை நிறைவேற்றுவதிலேயே குறியாக இருந்தார். தம் சிக்கன வாழ்க்கையின் பயனாகக் கிட்டிய பொருளையெல்லாம் கல்விக் கூடங்களை அமைத்து நம் இன மக்களுக்குப் பயன்படுமாறு செலவிட்டார்.
அய்யா-_ மணியம்மையார் திருமணம் என்ற எதிர்காலம் பற்றிய தொலைநோக்குள்ள ஏற்பாடு திட்டமிடப்பட்டபோது, அந்தத் திருமணப் பதிவு நடத்தப்படத் தேர்ந்தெடுக்கப்-பட்ட இடம் நாயகம் அவர்களின் இல்லம்தான்.

தம் வாழ்நாள் முழுதும் பிற்படுத்தப்பட்ட _ ஒடுக்கப்பட்ட மக்கட்காகவே உழைத்து வந்த நாயகம் 13.12.1944இல் இயற்கை எய்தினார். அவரது உருவச்சிலையொன்று சென்னை தியாகராயர் நகரில் உள்ள ‘தியாகராயர் உயர்நிலைப்பள்ளி’யின் முன்னால் நிறுவப்-பட்டுள்ளது.

அவர் மறைந்தபோது ‘குடிஅரசு’ ஏட்டில் தந்தை பெரியார் எழுதிய துணைத் தலையங்கம்.

“நம் அன்பர் ஆருயிர்த் தோழர் சி.டி.நாயகம் முடிவெய்திவிட்டார். இனி அவரது இடத்தைப் பூர்த்தி செய்ய ஆள் இல்லை என்கின்ற நிலையில், உண்மையாய் உழைத்து வந்த உத்தமர் மறைந்தார்.எளிய வாழ்க்கை உள்ளவர். அதனால் மீதப் பணத்தையெல்லாம் கல்விக்குச் செலவு செய்தவர், நினைப்பதுபோல் பேசுபவர், பேசுவதுபோல் நடப்பவர்.
உண்மையில் கண்ணியமானவர். வேஷத்திற்கு என்று நடக்கும் காரியம் அவரிடம் எதுவும் இருந்ததில்லை. அப்படிப்பட்ட பெரியார் முடிவெய்தினது நமக்கு மாபெரும் நட்டமென்றே சொல்லுவோம். அதுவும் பரிகரிக்க முடியாத நட்டமென்றே சொல்லு-வோம்.

அவரது குடும்பத்தார் பகுத்தறிவுவாதிகள், அவர்களுக்கு எவருடைய ஆறுதலும் தேவை இருக்காதென்றே கருதுகிறோம்.

தமிழ் மக்கள் ஆங்காங்கு கூட்டம்கூட்டி அவர்களது அனுதாபத்தை அக்குடும்பத்தாருக்கு தெரிவித்துக்கொள்ள வேண்டுகிறோம்.

நாயகம் அய்யா அவர்களைப் போலவே இருந்து உழைத்துவந்த அவரது வாழ்க்கைத் துணைவியார் தோழர் சிதம்பரம் அவர்கள் அய்யா அவர்கள் விட்டுப்போன காரியங்களை பின்தொடர்வார்கள் என்று உறுதி நமக்கு உண்டு.


குறிப்பு ஆதாரம்


1.குடிஅரசு’ _ 16.12.1944 

2.உண்மை இதழ், 1-15.10.2016


கடைசியாக திருத்தப்பட்ட நாள்; 20.10.2026

தமிழ்நாட்டுப் பெண்கள் மாநாடு (13.11.1938)

  தமிழ்நாட்டுப் பெண்கள் மாநாடு (13.11.1938) ஈ.வெ.ரா. அவர்களுக்கு 'பெரியார்' என்று பட்டம் கொடுத்த தமிழ்நாட்டுப் பெண்கள் மாநாடு! தந்தை...